Harbataligo TSB-ni Chubamwng

31 August 2024, Sabroom : Biyalni jorago lukurokno yak chubathanigo Tripura Swrwngnai Buthu (TSB) ni bwmwng barikhlai khurchajaknai. Srwngna...

31 August 2024, Sabroom: Biyalni jorago lukurokno yak chubathanigo Tripura Swrwngnai Buthu (TSB) ni bwmwng barikhlai khurchajaknai. Srwngnairokni hamwng-siniya jwngjalni bagoi samwng khlaimani badebo dopha hamkraini samwng aro hasteni lukurokni jwngjalni jorago jonom bokni korego bachagwi samwng khaiywi tongwk aro yak chubagwi tongwk.

Chwng chorokno siywk thangnai 19 August salmarini siming 24 August jora Tripura haste gnangoi agatiya garama aro krimasangcha khai uatwi uakha. Ibobai haste gnangoi twi lomkha, jejang naikho twi mang twi. Sai-sai lukurokni nok-hok, tongthai-chathai, malmata, mandwi-khundwi kmakha. Ibo simingya khorok thamchisa (31)ni slai kabang borokni naithok langma chokha hakuagwi, nok baikhrugwi. Aro kabangma borok sago dukho manbaijak. Aini bagoi tabok hachwk-para amchaini lukurok tongjaknai-chajaknaini barikhai biyalgo klaijak.

Ibotwi jwngjalni jorago tini TRIPURA SWRWNGNAI BUTHU, Belonia College Committeeni bwkhaktwi South Tripura hangkorni Sabrokm sub-divisionni Harbatali ADC Village amchai daiyo nok-hok baikhrujak, twi lomjak, langma chojak, birman manjak nukhungo bokni je chukmani, pharimanitwi mairung-maikham aro chajaknai mandwi-khundwi rogoi yak chubathangka.

Lukurokni biyalni jorago bokni korego bachagwi je chuktwi bokno yakchubani TSBni ibotwi jati kwthar samwng-homwngno nugwi amchaini lukurok barikhlai kha tongthoklaijakkha aro khatongjaklaikha. Phainai salobo TSB ibotwi haikai lukurokni jwngjalni jorago yak chubachu rothwk hinoi uansogo.