FIR Khlaijakkha Tripura Dopha aro Tripura Kokno Social Mediago Hamya Viral Khainairok

31 August 2024, Karbook: thangnai 19 Augustni siming 25 August jora Tripura haste gnangoi agatiya garama aro krimasangcha khai uatwi uakha....

31 August 2024, Karbook: thangnai 19 Augustni siming 25 August jora Tripura haste gnangoi agatiya garama aro krimasangcha khai uatwi uakha. Ibobai haste gnangoi twi lomkha, jejang naikho twi mang twi. Sai-sai lukurokni nok-hok, tongthai-chathai, malmata, mandwi-khundwi kmakha. Ibo simingya khorok thamchisa (31)ni slai kabang borokni naithok langma chokha hakuagwi, nok baikhrugwi.

I jegago Shantir Bazar sub-divisionni Gardang amchaini Ashini Kumar Roaja Parani kaisa Tripura dophani nukhungo ha kuagwi nok baikhrugwi khoroksni adongni langma chokha. Ibohaiklai jwngjal nangjak nukhungni khorokcha adong bai Madhu Debbarma bwmwngoi khorokcha koktma thumnai bo interview lathanigo Tripura kokbai samanino bijilaiya ongkha.

Koktmathungnai Madhu Debbarma bai swngjagoi birman mangjak nukhungni khoroksa adong ibohaikai Tripura kok bai saka,

"Ani nasarok iksaito thujak, chwng iksaito thujakya, thwi khwilai tongo". Satai klaiywk Tripura kokbai 'Khwi' hinmani ongkha 'khibi' বা 'ফেলা'. 

I kaisa kokthaino gamkhlai bijiywi nailaiyagwi video clipno meme funny snamgwi Suman Debbarma bwmwngoi khoroksa digital creator thangnai salkisa sakango bini Facebook accountwikhlai upload khlaiywi viral khlai rokha.  Ibobai tabok Tripura kokthaino hanang-pinang khlai khlaika aro Tripura dophano barikhlai lachimasangcha khlairokha. Ibo simingya, twilomgwi hakuagwi langma chojak nukhungni borok bai interviewni bwmwngoi barikhlai lachima khlaika. 

I patimwngno lagwi thangnai saltham-salbrwi jora rwngoi social media gnangoi kabangma lukurok khorang tisalaikha. Koktamthumnai Madhu Debbarmano Tripura dophani okra-chakrarok call khlaibo sakapho, i video clipno social mediani knoronani digital creator Suman Debbarmano rutugwi Tripura dophani daiyo nakarmwng binani bagoi. Mator bok tabokbo video clipno knorliya aro nakarmwngbo bimani nujakliya.

Aini bagoi Tripura doohani lukurok kha khamjaklaiywi paithago tini Tripura Chubalai Buthu, Karbook Divisional Committeeni bwkhaktwi khlai bok khoroknoini bwmwngoi Karbook PS daiyo FIR khlaijakkha. Tabok koktmathungnaini bwmwngoi aro digital creator ni bwmwngoi kaisa dopha, kaisa kok, birman manjak nukhungni borokbai ibotwi raida chaiya khlai samwng khlaimani aro lachima romani lagwi FIR khlaijakmano Policeni naikolphang rok tma yapri seno naising naithai.