Kaubruni Gosemwng Biywi TTAADCni CEMno Memorandum Yapharka BSM

14 June 2024, Khumulwng:  TTAADC amchaiyo Kaubruno gosemwng ronani, TTAADCni rwngnogo Kaubru subjectno sitongnani bimwng biywi tini BRU SNUN...

14 June 2024, Khumulwng: TTAADC amchaiyo Kaubruno gosemwng ronani, TTAADCni rwngnogo Kaubru subjectno sitongnani bimwng biywi tini BRU SNUNGNAI MTHOH (A REANG STUDENTS' ORGANISATION) -ni bwkhaktwi Tripura Tribal Areas Autonomous District Council ni Chief Executive Member machang Purna Chandra Jamatia ni daiyo memorandum balai yapharlaikha. 

Satai klaiywk, jora klokma rwngoi Reang ebakhlai Bru dophani lukurok bokni amani kok Kaubruno hapangni daiyo gosemwng bilaiywi phaijak. Bokni bimwngno jai-jai khlai naikani khlainani bagoi Tripura hapang kaisa Expert Committeebo khajak. Tabok i committeeni report hapangni daiyo klaimani olo tma yapri seno ibo naiywi naithai.

Ijang thangnai jora kisa sakango hasteni kabangma degree college daiyobo Kaubruno kaisa subject khlaiywi phrwngnani bagoi principalni daiyo memorandum balai yapharlaikha Bru Snungnai Mthoh (BSM). Tinibo TTAADCni hapangni daiyo Kaubruni gosemwng biywi memorandum balai yapharlaimani ibono lagwi TTAADC Tipra Motha hapang bwswk joratwi borom rogoi yapri seno aro jai-jaikhlai samwng charono ibo jorano naising naithai. 

TTAADC hapangni ojamarokbo i kokno mwito larwkthai, hasteni chorok habasa (indigenous) rokni hamkraini bagoino snamjakkha TTAADC. Aini bagoi chorok habasani amani kok, hukumu mukumu, laibumano rwngoi larwknani, mwthangwi larwknani, gosemwng ronani ongkha TTAADC hapangni samwng. Aini bagoi Kaubruni gosemwng bimani ibo bokni mathai-sokthai se.

Ibo badebo Tripura dophani lukurokbo bokni amani kok Tripura kokni gosemwng biywi jora kalokma rwngoi hapangni daiyo bimwng biywi phailaijak. I daiyo Tripura kokni gosemwng bimaninobo hapang jai-jai khlai borom rogoi uansoklaithai. Tmwi hinba, TTAADC hapang chorok habasano baksakhlai naithai.