Raida chaiya khlaiywi hapainai Bangladeshni Chakrarokno lagwi tini aro uaisa khorang tisaka Council of Tiprasa Hoda (CTH)

KOKMALAMA, September 22 2021, Agartala: Raida chaiya khlaiywi hapainai Bangladeshni Chakrarokno lagwi tini aro uaisa khorang tisaka Council ...

KOKMALAMA, September 22 2021, Agartala:

Raida chaiya khlaiywi hapainai Bangladeshni Chakrarokno lagwi tini aro uaisa khorang tisaka Council of Tiprasa Hoda (CTH). Tini Agartala Press Club daiyo songchajak koktmathungnairokni pana songchagwi ibono lagwi arouaisa khirang tisagwi saka. 

Thangnai 4th July 2021 salo Council of Tiprasa Hoda (CTH)ni bwkhaktwi raida chaiya khlai hapainai Bangladeshi Chakmarokno lagwi Hagarani Home Minister, Home Secretary, Hasteni Montriokra, montriokra yakchu, kebengnai bodolni ojama, TTAADC-ni CEM, Dhalai bai Gomati Hangkorni hangkorphangni daiyo kokton blai howi khorang tisaka. Mator taboksak jora mwngsabo kokphirokmwng  krwini bagoi aro uaisa haido khlaika i jwngjalno lagwi gamkhlaiywi naikolni bagoi. Tomwngno hagara aro haste haphang i jwngjalno lagwi gamkhlaiywi naikolya hinklai CTH naiywi tonglak, achokgoi tonglak. Nangkhai haste gnangwi gara khlaiywi choba khlainai. 

Ibo simingya, thangnai 9th September salo Joy Mani Chakma bwmwngwi khorokcha dopha-hani busu ongoi samwng khlainai Deoghar Express train bai Biharni phaiphugo Dharmanagar daiyo rwngjakkha Italygo snamjak kongtham pistol bai baksa.

Iro koktmathungnairokni panago CTH ni bakhaktwi khlai khorang tisajakkha, Joy Mani Chakma bo tabok Tripura hasteni ongphabo bo kwbwi kwbwi Bangladesh hagaranise. Chakmarok je tabok raida chaiya khlai Barot hagarago hapaiywk hinywi CTH je khorang tisamani ibo kwbwi kwbwino majakkha Joy Mani Chakmano. I kokno sagwi khnarokha CTH.

Tini i koktmathungnairokni panago arobo khorang tisaka, Gandatwisa bwkhasteni Nogurai Reangno khoroknoi Chakma samwng hamya khlainairok butok khlaiywi butharmanino lagwi. I butharmwngni patimwngno selengma phunuka CTH. I patimwngo krwngjak chlabani bisingyo chlaknoi rwngjakkha mator aro chlaknoi tabokbo kharjak, bohk Bangladesh hagarani borokse. Bohknobo datino rwngni ongthwk. Butharjaknai nukhungo rangkho-pwicha chubani ongthwk aro khorokchano sebok roni ongthwk hinywi haphangni daiyo bimwngni khorang tisaka  CTH.

CHT arobo khorang tisaka Tripura hastego datino NRC roni ongthwk.